Մարտուն Գրիգորյանը իր ամբողջ քարոզարշավը, կամ ավելի ճիշտ դրա ոչ եթերային մասը կառուցել էր նրա շուրջ, որ ՔՊ-ն ու Վարդանիկը համատեղ խաղ են խաղում, իբր ունեն պայմանավորվածություն, որ Վարդանիկը պիտի միանա ՔՊ-ին ու կամ հակառակը։
«Թաղային ռադիոյով» այս միտքն էր թևածում Գյումրվա մայլեքում՝ մեկտեղված «մենակ Մարտունն ա, որ Վարդանին ձեն չի տա» մտքի հետ։
Եվ անձամբ Մարտունին կամ նրա շրջապատին անձամբ ճանաչող մի շարք գյումրեցիներ, որոնք թեկուզ վաղը համապետական ընտրություններում ընտրելու են ՔՊ-ին՝ հավատալով այս կեղծիքին՝ ընտրել են Մարտունին։ Չէ՞ որ Մարտունն է, որ իր քաղաքական կարիերան կառուցել է Վարդանիկի հետ անտագոնիզմի շուրջ, Մարտունն է, որ ընկերներ, բարեկամներ է կորցրել Վարդանիկի հետ «ճակատամարտերում», Մարտունն է, որ Վարդանիկին միանալուց ստիպված պիտի լինի անցնել ընկերների թափված արյան վրայով, ու Մարտունն է, որ ամենալավը գիտի, թե ինչ է սպասվում հենց իր թիմի տղաներին, եթե Վարդանիկն ու նրա որդի Սպարտակը Գյումրիում իշխանության համ զգացին, Մարտունը գիտի, որ նրանք ՔՊ-ականներին անգամ 50 մետրից մոտ չեն գա, բայց Մարտունի թիմակից երիտասարդները 20 տարվա կուտակված ոխի առաջին զոհերն են դառնալու։
Եվ վերջիվերջո արդեն թոռներ ունեցող Մարտունը գիտի, որ իր թոռները չեն կարող երջանիկ մանկություն ունենալ մի քաղաքում, որտեղ Վարդանիկն ու Սպոն իշխանություն ունեն։
Իհարկե, մի կողմում Սերժ Սարգսյանը, Արթուր Վանեցյանն են, որ անձամբ կոչ են արել Մարտունին չխախտել նախնական պայմանավորվածությունը՝ քվեարկել ամենաշատ հավաքած ընդդիմադիր թեկնածուի օգտին, ասում են՝ Սերժը նույնիսկ մի քանի անգամ զանգահարել է Մարտունին, ասել, որ իր անունն է սեղանին, բայց իրավիճակի մյուս կողմում էլ շունչը պահած 120 հազարանոց քաղաքն է, որը չի ուզում, որը չի դիմանա ու որը կանիծի, կանիծի հենց Մարտունին՝ իր գլխին Վարդանիկի պես զուլում բերելու համար։ Ինչու՞ հենց Մարտունին, որովհետև Կարեն Սիմոնյանը իր 2 մանդատով ոչ մի եղանակ չի ստեղծում նա եթե նույնիսկ ՔՊ-ին միանա, էլի ոչինչ չի փոխի, Ռուբեն Մխիթարյանին էլ գյումրեցին առհասարակ լուրջ չի ընդունում։
Բալասանյանի մի թևի և գործարար Ադամյան Արտակի աջակցությամբ 2-3 հազար ձայն «քերած» Ռուբենը միանգամյա օգտագործման էր, այդ մի անգամը նրան արդեն օգտագործեցին, Վարդանիկին միանալու նրա հայտարարությունից հետո նրանից հրաժարվեցին իր ցուցակի 3-րդ համարը, մի շարք աջակիցներ՝ հիմնականում երիտասարդ, «Հայաթ» բենդի կին արտիստները դժվար թե ցնծությամբ ընդունած լինեն կանանց նկատմամբ բռնությունն արդարացնող Վարդանիկի ու Ռուբենի միությունը։ Մի խոսքով՝ այս երեքից միակ լուրջ մարդը, որը անկախ ամեն ինչից անուն ունի՝ Մարտունն է ու Մարտունն է մնալու գյումրեցիների հավերժ նզովքի տակ, եթե Վարդանիկին կապի գյումրեցիների գլխին։
Ու այս ամենը Մարտունը բոլորից լավ գիտի։ Ի՞նչ կորոշի նա. մատաղ կանի՞ իր թոռների երջանիկ մանկություն ունենալու հնարավորությունը՝ հանուն Սերժի խոստումը պահելու, թե՞ ոչ։ Որոշողն ինքն է։
Նյութի աղբուր